Një nga ngjarjet më tronditëse të viteve të fundit, vrasja e gjyqtarit Astrit Kalaja brenda ambienteve të Gjykatës së Apelit të Tiranës, ka ekspozuar një dështim dramatik të sistemit të sigurisë dhe përgjegjësisë shtetërore. Por më tronditëse se vetë krimi ka qenë reagimi zyrtar i ministres së Rendit, Albana Koçiu, e cila deklaroi publikisht se “policia nuk mban përgjegjësi për atë që ndodh brenda gjykatave”.
Një dështim institucional i pastër.
Sipas burimeve mediatike dhe dëshmive nga vendngjarja, autori i krimit, Elvis Shkambi, ka hyrë në godinën e gjykatës i armatosur, pa asnjë kontroll sigurie. Detektori i metaleve, që duhet të ishte në funksion në hyrje, ka qenë i prishur prej ditësh, ndërsa oficerët e sigurisë në detyrë nuk kanë kryer kontroll fizik ndaj personave që hynin në sallë.
Kështu, një person me precedentë penalë, që kishte ardhur për të ndjekur seancën, ka mundur të ulet normalisht në sallë, të dëgjojë vendimin dhe më pas të qëllojë tre herë mbi gjyqtarin Kalaja, duke e lënë të vdekur në vend. Nga të shtënat janë plagosur edhe dy persona të tjerë, babë e bir, që ishin palë në proces.
Pas ekzekutimit, autori dorëzoi armën në oborrin e gjykatës dhe u arrestua nga policia pa asnjë rezistencë.
Një deklaratë që fshin përgjegjësinë
Në vend që të kërkonte llogari dhe të merrte masa urgjente për një dështim të qartë institucional, ministrja Koçiu zgjodhi të justifikojë policinë duke u shprehur se “në objektet gjyqësore përgjegjësia e sigurisë i takon Gardës dhe jo Policisë së Shtetit”.
Ky qëndrim, i cilësuar nga juristë dhe qytetarë si “një apologji skandaloze”, bie ndesh me ligjin për Policinë e Shtetit, ku përcaktohet qartë se policia ka detyrimin e garantimit të rendit publik dhe sigurisë në çdo institucion shtetëror, veçanërisht në raste të ngjarjeve të rënda kriminale.
Deklarata e ministres, përveçse banalizon një akt të tmerrshëm, përçon edhe një mesazh alarmant për sistemin e drejtësisë: se në Shqipëri, as gjyqtarët nuk janë më të mbrojtur, dhe se shteti nuk pranon asnjë përgjegjësi kur dështojnë strukturat e tij.
Tronditja e sistemit të drejtësisë
Vrasja e gjyqtarit Kalaja ka krijuar një atmosferë frike dhe revoltë në sistemin gjyqësor. Kolegjët e tij e kanë cilësuar aktin si një “sulm ndaj vetë drejtësisë”, ndërsa Unioni i Gjyqtarëve ka kërkuar hetim të plotë mbi dështimet e sigurisë dhe dorëheqjen e menjëhershme të ministres së Rendit.
Sepse në një shtet normal, një gjyqtar që vritet në zyrë, nuk është “aksident” është dëshmi e kolapsit të shtetit ligjor.
Drejtësia u vra në zyrë. Heshtja dhe justifikimet janë plumbat e dytë që po e mbysin çdo ditë. Publik Media
