Pas grabitjes së Këshillit Bashkiak në Shkodër me votimet një partiake të 30 qershorit, kryeministri Edi Rama po përdor çdo mjet për të marrë drejtimin e kësaj bashkie. Ditën e sotme, Thesari i Shtetit në varësi të Ministrisë së Financave ka ndërprerë pagesat për të gjithë veprimtarinë e institucioneve të bashkisë që drejtohet nga kryetarja e ligjshme, Voltana Ademi. Bllokimi i pagesave do të thotë se bashkia nuk ka më fonde për të ushtruar aktivitetin duke nisur që nga shërbimet vendore dhe deri të pagesat për çerdhet e kopshtet dhe pastrimin.
Denoncimi është bërë sot nga Voltana Ademi. Kryebashkiakja i ka shkruar një letër Ministrisë së Financave ku i kërkon sqarime për bllokimin e pagesave dhe i sugjeron tërheqjen nga një vendim i tillë. Letra i është dërguar dhe SHBA dhe gjithë trupit diplomatik në Tiranë. Ademi sqaron se me bllokimin e fondeve nuk preket thjesht Bashkia e Shkodrës, por gjithë qytetarët të cilët nuk mund të marrin shërbime.
“Sot ka ndodhur një ngjarje e paprecedent në historinë e administrimit të vetëqeverisjes vendore. Ditën e sotme, Dega e Thesarit në Shkodër nuk ka pranuar të kryejë veprimet përkatëse për likuidimin e faturave për shërbimet e Bashkisë Shkodër. Po ashtu, kjo degë nuk ka pranuar as ato procedura për të cilat është autorizuar zv.kryetarja e Bashkisë Shkodër. Me këto veprime të jashtëligjshme nuk po bllokoni kryetaren e Bashkisë Shkodër, por qytetarët dhe shërbimet ndaj tyre. Ju keni bllokuar sot rikonstruksionin e rrugës Oblikë-Velinaj-Alimetaj, shërbimin e gjelbërimit, shërbimin e varrezave, shërbimet për mirëmbajtjen e stadiumit “Loro Borçi”, e të tjera punë në proces, si projektimet dhe vijimin e investimeve me fondet e veta të Bashkisë Shkodër, pasi qeveria e ka “nxjerrë nga harta” e investimeve Shkodrën prej gjashtë vitesh”,- shkruan ndër të tjera Ademi.
Sipas Drejtorisë së Përgjithshme të Thesarit, Voltana Ademit i ka mbaruar mandati ditën e sotme, në orën 16:30. “…sipas ligjit, kryetares së Bashkisë i mbaron mandati më datë 20.08.2019, ora 16:30 sipas orarit zyrtar, për ditët në vijim do të jetë këshilli bashkiak që duhet të zgjidhë problemin”, thuhet në email- in dërguar Ademit nga dega e Thesarit. Çudia në këtë rast është se afatin e mandatit të Voltana Ademit, pas dorhëqjes së Valdrin Pjetrit, nuk e përcakojnë dot as juristët dhe institucionet. Dega e Thesarit Shkodër duket se ka marrë dhe rolin e KQZ-së.
Në fotot (poshtë) komunikimi i Bashkisë së Shkodrës me zyrtarë të Degës së Thesarit Shkodër
