Kryeministri bullgar Kiril Petkov tha sot në Bruksel se nuk ka asnjë shans që Bullgaria të heqë veton ndaj Maqedonisë së Veriut gjatë këtij samiti të BE-së që po mbahet në kryeqytetin belg.
Petkov në një deklaratë për mediat para fillimit të samitit BE-Ballkani Perëndimor tha se qëndrimi i Bullgarisë do të mbetet i pandryshuar derisa Asambleja Kombëtare të thotë fjalën e saj.
Petkov, tani në cilësinë e ish-kryeministrit, i qëndron mendimit të tij se parlamenti duhet të miratojë një rezolutë që lejon heqjen e vetos, bazuar në miratimin e propozimit të Presidencës franceze.
Petkov tha se i pëlqente “personalisht” propozimi francez, por nuk i takonte atij, por parlamentit të merrte një qëndrim.
Duke folur me gazetarët në pragun e samitit të BE, Petkov shpjegoi se parlamenti bullgar duhet të japë dritën jeshile për heqjen e vetos dhe vetëm atëherë ai do të bënte lëvizjen e tij që duhet të jetë e qëndrueshme me kalimin e kohës, pavarësisht se kush qeveris.
“Kjo është ajo që do t’u them liderëve të BE-së”, tha ai.
Ai shpjegoi se opozita bullgare përdori çështjen maqedonase për ta shantazhuar kabinetin e tij sa herë që kishin frikë.
Situata e tensionuar politike në parlamentin bullgar pas votimit të mosbesimit të miratuar dje nuk ndihmon për një zgjidhje të shpejtë të problemit të vetos.
