Administrata Trump ka pezulluar të gjitha aplikimet për imigracionin nga 19 vende që konsiderohen me rrezik të lartë për shtetasit amerikanë.
Pezullimi vlen për njerëzit nga 12 vendet, qytetarët e të cilëve janë ndaluar të hyjnë në Shtetet e Bashkuara që nga qershori, si dhe për qytetarët e shtatë vendeve të tjera që më parë ishin subjekt i kufizimeve të vizave, sipas një dokumenti nga zyrtarët e imigracionit të parë nga AFP. Aplikimet për karta jeshile nga shtetasit e këtyre vendeve janë pezulluar.
Qershorin e kaluar, Donald Trump urdhëroi ndalimin e hyrjes në Shtetet e Bashkuara për qytetarët e Afganistanit, Burmës, Çadit, Republikës së Kongos, Guinesë Ekuatoriale, Eritresë, Haitit, Iranit, Libisë, Somalisë, Sudanit dhe Jemenit. Shtatë vendet e tjera janë Burundi, Kuba, Laosi, Sierra Leone, Togo, Turkmenistani dhe Venezuela.
Dje, presidenti amerikan bëri komente ndaj Somalisë, duke thënë se emigrantët nga ai vend afrikan nuk do të jenë të mirëpritur në Shtetet e Bashkuara.
“Unë nuk i dua ata në vendin tonë”, tha ai.
Pas sulmit të 26 nëntorit, që i atribuohet një shtetasi afgan i cili vrau një ushtare të Gardës Kombëtare dhe plagosi rëndë një ushtar tjetër, administrata Trump ka ngrirë të gjitha vendimet për dhënien e azilit në Shtetet e Bashkuara.
