Shkruan Veronike Shkreli Pepushaj
Vëllai i dëshmorit të demokracisë Nazmi Kryeziut, Muhameti, ose Buli siç e thërrasin miqtë, ka sjellë për publikun një fotografi të disa figurave të njohura të kulturës, sportit dhe jetës shoqërore, mes të cilëve edhe Nazmi Kryeziu.
Një person i qeshur, i dashur, i kompletuar me gjithçka i ka hije një personi plot mirësi e dëshira, për të jetuar i lirë mes njerëzve e sakrifikuar edhe për të tjerët, nuk kishte se si të mos binte në sy të sigurimit famëzi të diktaturës komuniste.
Degë e një familjeje me tradita, të respektuar dhe që nuk e përkuli kurrë krenarine e të qënit disident i diktaturës, më 2 Prill 1991, kur populli i Shkodrës protestoi fuqishëm në mbrojtje të votave të vjedhura, i pa harruari Nazmi Kryeziu, u bë pishtar i ditëve që jetojmë sot.
Bisha komuniste donte gjak, dhe me Nazmiun, Arben Brocin, Bujar Bishanakun dhe Besnik Cekën që na i morën si peng, shkarraviiti besën se si shqiptari e vret shqiptarin vetëm të mbajë pushtetin e krimit.
Tani, pas 33 vitesh që ne jetojmë e nderojmë kujtimin e Nazmiut me shokë e miq të mirë, ngushëllohemi me këtë fytyrë flamur të lirisë.
E përcollëm këtë fotografi që edhe brezat pas nesh ta mbajnë si kujtim, kështu siç ishte, i mirë, i qeshur, i dashur.
Nazi është më i riu.
Kështu ka ngelur edhe sot. Kështu do të jetë gjithmonë.
