Presidenti i SHBA Donald Trump i ka bërë thirrje Izraelit të anulojë gjyqin për korrupsion të Benjamin Netanyahut, duke e cilësuar çështjen kundër udhëheqësit izraelit si një “gjueti shtrigash”.
Trump tha në Truth Social se ai dhe Netanyahu “kaluan ferrin së bashku” duke luftuar Iranin dhe udhëheqësi izraelit “nuk mund të kishte qenë më i mirë, më i mprehtë ose më i fortë në dashurinë e tij për Tokën e Shenjtë”.
Duke e cilësuar Netanyahun si një “luftëtar”, presidenti amerikan tha se pavarësisht kësaj, ai tha se Netanyahu ishte thirrur në gjykatë të hënën.
“Një gjueti e tillë shtrigash, për një njeri që ka dhënë kaq shumë, është e paimagjinueshme për mua”, tha Trump, i cili vetë është përballur me një numër akuzash dhe dënimesh penale.
“Ai meriton shumë më mirë se kjo dhe kështu e meriton edhe shteti i Izraelit. Gjyqi i Netanyahut duhet të anulohet menjëherë dhe t’i jepet falje një heroi të madh, i cili ka bërë kaq shumë për shtetin. SHBA-të ishin ato që “shpëtuan Izraelin” dhe tani do të jenë SHBA-të ato që “shpëtojnë Netanyahun”, tha Trump.
Në vitin 2019, Netanyahu u padit në Izrael për akuzat e ryshfetit dhe mashtrimit.
Ai akuzohet për pranimin e dhuratave nga miqtë milionerë dhe për kërkimin e favoreve rregullatore për manjatët e medias në këmbim të mbulimit të favorshëm. Netanyahu ka mohuar akuzat dhe ka deklaruar se nuk është fajtor.
