Kërkesa e Prokurorisë së Posaçme Antikorrupsion që për tre gjyqtarët e dosjes “Dajti”, Skënder Damini, Petrit Alija dhe Aleks Nikolli të pushohen hetimet është rrëzuar nga Gjykata e Posaçme Antikorrupsion.
Pas një viti hetime, të cilat janë zgjatur dy herë, prokuroria pretendon se ka rezultuar që nuk ka asnjë provë dhe fakt për akuzat e ngritura.
Për shkak të akuzave të ngritura, çështja kaloi automatikisht në SPAK dhe prokurori i posaçëm, kërkoi nga Gjykata pushimin e hetimeve. Pas një seance që zgjati rreth 1 orë, Gjykata vendosi të kthej dosjen për hetime të mëtejshme.
Skënder Damini, Aleks Nikolli dhe Petrit Alia, u vunë nën hetim nga Prokuroria për Krime të Rënda, pas akuzave publike se pranimi i gjykimit të shkurtuar që shpëtoi Dajtin, i dënuar për vrasjen e 4 policëve, nga burgimi përjetë, ishte aferë korruptive.
Në shkurt të 2019-ës, banesat e 3 gjyqtarëve u kontrolluan me urdhër gjykate, por nuk u gjet asgjë kompromentuese, sa i takon rastit dhe çështjes Dajti.
Tre gjyqtarët i kanë mohuar akuzat e ngritura ndaj tyre.
