Me qëllim konfirmimin e nivelit të shkëlqyer të marrëdhënieve dypalëshe me Italinë, por edhe promovimin e përfshirjes së Turqisë në mbrojtjen evropiane, presidenti turk Rexhep Tayip Erdogan ka mbërritur në Romë për Samitin e 4-t Ndërqeveritar Turqi-Itali .
Takimi i parë ndërqeveritar midis dy vendeve u mbajt në vitin 2008 në Izmir dhe i fundit u zhvillua tre vjet më parë në Ankara. Bisedimet ndërqeveritare të sotme po zhvillohen në një moment jashtëzakonisht të veçantë, me pasigurinë gjeopolitike që dominon në nivel global, frontet në Ukrainë dhe Lindjen e Mesme.
Roma është një nga aleatët dhe mbështetësit më të ngushtë të Turqisë, dhe Meloni në veçanti ka mbështetur procesin e afrimit të Turqisë me BE-në, ndërsa theks i veçantë i është kushtuar marrëdhënieve ekonomike dhe investimeve, pasi shumë kompani italiane investojnë në Turqi.
Për Turqinë, bashkëpunimi në sektorin e mbrojtjes dhe armatimeve është gjithashtu jashtëzakonisht i rëndësishëm, ku një pikë kulmore është blerja e kompanisë italiane Piaggio Aerospace nga Baykar turk, e cila nënshkroi gjithashtu një marrëveshje bashkëpunimi me kompaninë italiane të mbrojtjes Leonardo, një nga më të mëdhatë në Evropë.
Këto partneritete me industritë italiane të mbrojtjes, përveç përfitimit shtesë që ato i ofrojnë industrisë turke të mbrojtjes, vlerësohet se përdoren për të ndihmuar Turqinë të marrë një pjesë të paketës së madhe të armëve të BE-së.
Axhenda e takimit Erdogan-Meloni dhe Konferencës Ndërqeveritare pritet të përfshijë emigracionin, si dhe zhvillimet rajonale, pasi kryeministrja e Italisë ka biseduar disa herë me Erdogan në muajt e fundit mbi çështjet që kanë të bëjnë me Ukrainën, Detin e Zi dhe Lindjen e Mesme.
