Ish-kryeministri Sali Berisha pritet të vërë sot në zbatim skenarin për trazira dhe për të marrë me dhunë PD. Pas përballjeve të 11 dhjetorit dhe asaj të 18 dhjetorit me Bashën, ish-kryeministri ka zbritur te skenari që kërcënonte prej disa muajsh, ai i protestave. Berisha ka thirrur sot të gjithë mbështetësit e tij në një protestë kundër presidentit serb, i cili do të vijë në Tiranë.
Por më shumë sesa një protestë kundër Vuçiç, ajo pritet të jetë një manovër për të marrë me dhunë PD dhe për të shkaktuar trazira.
Vetë Berisha ka kërkuar dje nga mbështetësit që ta ndjekin sot në protestën që do nisë pranë Selisë së PD dhe do vijojë para Kryeministrisë. “Protestë kombëtare kundër mega vjedhjes së inceneratorëve dhe paktit kombëtar Rama-Vuçiç! E hënë 20 Dhjetor -16:00! Mbledhja tek selia e PD dhe nisja drejt kryeministrisë”, shkruan Berisha.
Pritet marrja e selisë së PD
Por protesta e nisur kundër Vuçiç, duket se ka një tjetër qëllim, atë të marrjes me forcë të PD. Deri më tani Berisha është stepur të hyjë forcërisht duke ju trembur një reagimi policor. Por duke pasur pas vetes një turmë më të madhe, dalja jashtë kontrollit mund të jetë alibia për të hyrë forcërisht në seli. Tubimi do nisë para PD dhe do vijojë te Kryeministria, por mësohet se turma do kthehet sërish në seli dhe këtë herë Berisha do tentojë të marrë karrigen e Lulzim Bashës.
Të paktën këto janë planet që qarkullojnë në korridoret e politikës dhe duket se kjo protestë do jetë një provë force për ish-kryeministrin.
Ndërkohë sipas burimeve, policia është vënë e gjitha në gatishmëri pasi ka sinjale se mund të ketë konfrontime. Janë qindra efektivë policie, të Gardës së Republikës, forcave speciale, madje edhe civilë, që do të angazhohen para Kryeministrisë dhe institucioneve të tjera, edhe pse nuk dihet ende skenari i ish-kryeministrit Sali Berisha për protestën e sotme.
Që në orët e para të mëngjesit pritet të vendosen gardhe metalike rreth e rrotull selisë së qeverisë, shtyllat janë lyer me graso, ndërkohë që janë vendosur kamera me rezolucion të lartë për të pasur nën mbikëqyrje situatën.
Pra, duket qartë se Policia e Shtetit i druhet një përshkallëzimit të situatës dhe trazirave gjatë protestës së sotme të thirrur nga Berisha.
