Deputeti i Partisë Demokratike Flamur Noka i del në mbrojtje ish-presidentit Ilir Meta duke thënë se nuk ka qenë bashkëpunëtor i Sigurimit të Shtetit.
Sipas Nokës, këto janë sulme të sajuara kryeministrit Edi Rama, i cili është “në panik nga opozita e vërtetë”. Noka thotë se Rama ka trilluar dhe sajuar edhe për Sali Berishën, por i dha efektin e kundërt.
Reagimi i Flamur Nokës:
“Rilindja” në panik nga fuqizimi dhe bashkimi i Opozitës shqiptare
Rama dhe Rilindja kanë rënë në panik se po shohin ditë pas dite se Opozita i ka ikur nga pengmarrja dhe i kanë ngelur veç pak pengje. Ai po shikon se PD po ringrihet fuqishëm nga lidershipi i Berishës dhe se Ilir Meta po ringre pjesën tjetër të Opozitës. Opozita e vërtetë po bëhet gati ta rrëzojë armikun e shqiptarëve të ndershëm.
Pasi nuk la gjë pa sajuar e trilluar për Sali Berishën, çka i dha efektin e kundërt, tani i është kthyer pjesës tjetër të Opozitës, me shpresë se mbase në këtë rast trilli dhe shpifja do të japin efekt.
Ilir Meta është i vetmi politikan që ka ushtruar tre prej detyrave më madhore të shtetit shqiptar, ku në secilën prej tyre është zgjedhur me mbështetjen e gjerë të socialistëve dhe Edi Ramës.
Prej vitit 1996, Ilir Meta i është nënshtruar verifikimit të figurës dhe rezulton i papërfshirë në llogari të Sigurimit të Shtetit.
Sulmi ndaj ish Presidentit Meta është një zhurmë politike e kurdisur në zyrat e sigurimsave patronazhistë të Rilindjes, të cilët bashkë me Edi Ramën po turfullojnë nga sikleti i 7 korrikut dhe ajo që i pret përpara. Atake paniku nga opozita e vërtetë.
