Vo Van Thuong raportohet se ka dhënë dorëheqjen pas vetëm një viti si president i Vietnamit. Partia komuniste në pushtet njoftonte dje se presidenti “ka thyer rregullat politike” dhe kjo ka prekur reputacionin e tij. Vietnami karakterizohet si vend “me stabilitet” që sigurohet me regjimin rigoroz komunist të partisë dhe kjo është hera e dytë që një president detyrohet të dorëhiqet brenda një viti në detyrë. 53-vjeçari Vo Van Thuong, ishte personi më i ri që mbante këtë pozicion, dhe tani u bë dhe presidenti me mandatin më të shkurtër.
Pararendësi i tij Nguyen Xuan Phuc dha dorëheqjen vitin e kaluar pas dy vitesh në detyrë, teksa të dy kishin akuza lidhjeje me skandale korrupsioni. Shpjegimet e dhëna nga qeveria nuk tregonin shumë për arsyet e masës, duke thënë vetëm se presidenti Thuong “shkeli rregullat dhe se mangësitë e tij prekën opinionin publik dhe dëmtuan reputacionin e partisë, shtetit deh atij vetë”. Mediat thanë se ai është përfshirë në akuza ryshfeti të bëra ndaj disa zyrtarëve në lidhje me pronat e biznese në Quang Ngai, ku ai ka qenë më parë kryetar i partisë.
Në Vietnamin komunist postet më të larta qeveritare renditen nga lart poshtë presidenti, kryeministri, sekretari i përgjithshëm i partisë dhe parlamenti. Por posti i presidentit është kryesisht ceremonial dhe konsiderohet si një prag për t’u bërë më pas sekretar i përgjithshëm i partisë komuniste. “Duket se kemi të bëjmë me një skandal të 12 viteve më parë” tha eksperti britanik Carl Thayer, për BBC, duke shtuar se largimi i tij hap garën dhe luftën e brendshme për të zënë vendin. Largimi presidentit përkon me gjyqin e zhurmshëm në vend të ndërtuesit të njohur vendas Ho Chi Minh akuzuar për mashtrime të mëdha financiare.
