Qeveria amerikane ka vendosur të ndërpresë të gjitha fondet për Organizatat Jo Qeveritare (OJQ) në Shqipëri dhe Maqedoninë e Veriut. Fillimisht, SHBA kishte pezulluar fondet e USAID-it për këto organizata, por vendimi i fundit ka qenë që t’i ndërpresin plotësisht.
Burimet bëjnë me dije se ky vendim është marrë vetëm për OJQ-të në dy vendet ballkanike, ku shtrirja e influencës së miliarderit George Soros ka qenë më e madhe. Kjo masë erdhi pas disa shqetësimeve nga Komisioni i Posaçëm i Efikasitetit të Qeverisjes në Kongresin amerikan, i cili ka deklaruar se ndihma amerikane përmes USAID-it është përdorur nga Soros për të ndikuar në drejtësinë dhe politikat e vendeve të Ballkanit Perëndimor.
Në një njoftim përkatës, Qeveria amerikane ka njoftuar se “grantet tuaja po ndërpriten për lehtësinë e Qeverisë së Shteteve të Bashkuara, në përputhje me një direktivë nga Sekretari i Shtetit të SHBA, Marco Rubio”. Po ashtu, njoftimi thekson se ky është një vendim politik, i cili është marrë për të përputhur fondet me prioritetet dhe interesat kombëtarë të SHBA-së.
USAID, agjencia kryesore e Qeverisë amerikane për ndihmën civile dhe zhvillimore, ka qenë aktive në më shumë se 100 shtete, duke shpërndarë fonde të shumta, përfshirë edhe Shqipërinë. Administrata Trump ka kritikuar programet e USAID-it si joefikase dhe ka argumentuar se disa prej funksioneve të kësaj agjencie do të menaxhohen nga Departamenti i Shtetit, duke bllokuar kështu fonde të mëtejshme për të.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
