Në rubrikën “Komenti i Ditës”, foli gazetari Dritan Hila, i cili në perceptim popullor njihet si gazetar që mbron Edi Ramën, për shkarkimin e drejtorit të përgjithshëm të Policisë Gledis Nano. Lajm ky që u konfirmua nga ministri i Brendshëm Bledi Çuçi, pas mbledhjes së qeverisë sot dhe që ngjalli një mori reagimesh në opinionin publik.
Hila shprehet se policia në vendin tonë gjendet përballë krimit, e keqpaguar dhe me një status, i cili e bën viktimë të ndryshimeve politike. Policia jonë është jo vetëm e keqpaguar, por edhe e keqtrajtuar dhe me mjete të dobëta krahasuar me ato që përdor krimi
“Shkarkimi i drejtorit të përgjithshëm të policisë Gledis Nano, i cili është edhe një nga drejtorët më jetëshkurtër në polici. Kush ka ndjekur televizionet italiane, dhe nëse shohim strukturën e Policisë italiane, nga e cila jemi bazuar për të krijuar edhe strukturën e policisë së vendit tonë, ka parë që drejtuesit e policisë italiane janë shumë jetëgjatë. Ndërsa zoti Nano pati një periudhë shumë të shkurtër shërbimi, por edhe të tjerët pas tij nuk kanë patur një periudhë të gjatë shërbimi.
Kjo gjë, përveç krijimit të pasigurisë ndërmjet radhëve të policisë, krijon edhe pamundësinë e zhvillimit të reformave. Kur u prezantua zoti Nano në fillim, u tha se ishte I specializuar në luftën kundër terrorizmit në SHBA, kishte marrë pjesë në kthimin e fëmijëve shqiptarë që kishin mbetur në kampet e refugjatëve në Siri. U shpresua që do të kishte njohuri edhe me luftën kundër krimit shqiptar, i cili është bërë i sofistikuar. Dhe mesa duket, kjo ka qenë pika e dobët e zotit Nano, nuk ka ditur të updatohet në realitetin e krimit shqiptar”, u shpreh Hila në fjalën e tij.
