Vaksina e gripit është gjithashtu efektive në parandalimin e goditjes në tru, të çdo forme. Ky është një zbulim domethënës që nxjerr në pah përfitimet e shumta të vaksinës së gripit, një “mburojë” jo vetëm kundër sëmundjeve të frymëmarrjes, por siç dëshmohet nga disa studime edhe kundër sëmundjeve kardiovaskulare.
Tani një studim i ri ka konfirmuar se mund të na mbrojë edhe nga goditjet në tru. Efektiviteti i gjetur është i tillë që autorët e sondazhit rekomandojnë përdorimin e vaksinimit kundër gripit si një strategji të shëndetit publik, për të mbrojtur popullatën e përgjithshme nga goditjet. Jo vetëm ata në rrezik.
Shkencëtarët, dolën në përfundimet e tyre pasi kryen një studim statistikor të të dhënave të Planit të Sigurimit të Kujdesit Shëndetësor të Albertës, që lidhet me të gjithë banorët e provincës kanadeze të Albertës.
Në total, rreth 4.2 milionë qytetarë të rritur të regjistruar në sistemin shëndetësor provincial kanadez u përfshinë në studim midis 30 shtatorit 2009 dhe 31 dhjetorit 2018. Gjatë periudhës së ndjekjes, e cila zgjati 10 sezone gripi, rreth 1.8 milionë pjesëmarrës ( 42.73 për qind e totalit) iu nënshtruan të paktën një vaksinimi kundër gripit.
Përveç kësaj, ka pasur 38,126 raste të goditjes gjatë periudhës së studimit. Duke krahasuar të gjitha të dhënat, u vu re se incidenca e goditjeve në tru është ulur me 22 për qind në popullatën e vaksinuar, me mbrojtje të konsiderueshme në gjashtë muajt pas administrimit. Si burrat ashtu edhe gratë ishin të mbrojtur dhe reduktimi i rrezikut u përmirësua me moshën.
“Vaksina e gripit dihet se zvogëlon rrezikun e sulmit në zemër dhe shtrimit në spital për njerëzit me sëmundje të zemrës. Ne donim të zbulonim nëse vaksina ka të njëjtat cilësi mbrojtëse për njerëzit në rrezik të goditjes në tru“, tha ai në një deklaratë për shtyp.
