Faqja e internetit e Agjencisë Amerikane për Zhvillim Ndërkombëtar ishte jashtë linje gjatë fundjavës, ndërsa administrata Trump vijon të rishikojë të ardhmen e saj dhe ndihmën e huaj amerikane në përgjithësi.
Masa vjen pas një urdhri ekzekutiv të Presidentit Donald Trump muajin e kaluar për të ndalur dhe rivlerësuar ndihmën e huaj të SHBA-së. Miliarda dollarë nga ndihma e SHBA-së që zakonisht bashkërendohen nga agjencia e pavarur, u ngrinë dhe disa zyrtarë të lartë u pezulluan.
Urdhri bëri që shumë përfitues të ndihmës, veçanërisht në Afrikë dhe në Ukrainë, të mbeteshin thatë. Agjencia ofron mbështetje për çdo gjë, nga projektet humanitare e nismat shëndetësore e deri te ndihma ndaj fatkeqësive.
Sekretari i Shtetit Marco Rubio ka lëshuar një përjashtim nga ngrirja për disa “ndihma humanitare për shpëtimin e jetës” ndërsa po kryhet një rishikim tre mujor për të përcaktuar se cili nga mijëra projektet e ndihmës së huaj të SHBA-së përputhet me vizionin e Trump.
Programet e agjencisë gjithashtu përfshihen shpesh në prioritetet kryesore të politikës së jashtme, të tilla si ndihma për tranzicionin energjetik të vendeve, konkurrencën me Kinën në projektet e infrastrukturës dhe kundërshtimi i ndikimit të Moskës dhe Pekinit.
Nën administratën Biden, SHBA dhe aleatët e saj të G7 ranë dakord për disa nisma për të konkurruar me programin e stërmadh të infrastrukturës së Kinës dhe ndikimin kudo, nga Afrika në Amerikën Latine dhe Azi.
Administrata e re e sheh ndihmën e huaj si bamirësi dhe nuk merr parasysh se si ajo u shërben interesave gjeopolitike të SHBA-së, tha një diplomat nga një vend i G7, i cili nuk pranoi të identifikohej.
Disa raporte, duke përfshirë Reuters dhe New York Times, sugjeruan se agjencia së shpejti mund të futet në Departamentin e Shtetit sipas planeve të Trump.
Ligjvënësit demokratë paralajmëruan në rrjetin social X, ku llogaria kryesore e USAID-it u errësua gjatë fundjavës, se çdo veprim për të eliminuar pavarësinë e agjencisë do ishte i paligjshëm, kundër interesave të SHBA-së dhe nga kjo do përfitonte Kina.
Presidenti Trump emëroi Musk, njeriun më të pasur në botë, si kreun e DOGE, një zyrë e re qeveritare që fillimisht u premtua të krehte gjithë burokracinë federale në kërkim të shkurtimeve të thella.
Në ditët që kur Trump mori detyrën, Musk ka kërkuar të ushtrojë kontroll gjithëpërfshirës mbi funksionimin e brendshëm të qeverisë së SHBA-së, duke emëruar zëvendësues për një kohë të papërcaktuar në disa agjenci, përfshirë Zyrën e Menaxhimit të Personelit, e cila në thelb merret me burimet njerëzore federale, dhe Administratën e Shërbimeve të Përgjithshme , e cila administron pasuri të paluajtshme.
DOGE tani është vendosur në një zyrë të Shtëpisë së Bardhë e njohur më parë si Shërbimi Dixhital i SHBA-së, por tani i quajtur Shërbimi DOGE i SHBA-së dhe ka shikueshmëri të gjerë në teknologji në gjithë qeverinë.
Lëvizja e administratës për të larguar zyrtarët e lartë të sigurisë në USAID vjen një ditë pasi asistentët e DOGE të Musk fituan qasje në një sistem të ndjeshëm të Departamentit të Thesarit përgjegjës për triliona dollarë në pagesat e qeverisë amerikane pasi administrata dëboi një zyrtar të lartë të departamentit, sipas tre personave që folën në kushte anonimiteti.
