Zyrtarë të sistemit të drejtësisë shqiptare kanë marrë pjesë në një trajnim të specializuar të udhëhequr nga FBI, me fokus hetimin e krimeve kibernetike dhe luftën kundër shfrytëzimit të fëmijëve në internet.
Lajmi u bë i ditur nga Ambasada e Shteteve të Bashkuara në Tiranë, e cila mbështeti pjesëmarrjen e gjyqtarëve, prokurorëve, hetuesve dhe oficerëve të policisë gjyqësore shqiptare në këtë program të zhvilluar në Akademinë Ndërkombëtare të Zbatimit të Ligjit të Shteteve të Bashkuara në Budapest.
Sipas njoftimit, trajnimi u përqendrua në përhapjen e materialeve të shfrytëzimit të fëmijëve online, mënyrat e shpërndarjes së përmbajtjes së dëmshme dhe identifikimin e zhvillimeve të reja në ndjekjen kibernetike. Programi trajtoi gjithashtu identifikimin e viktimave, hetimin e rasteve dhe ndjekjen penale të autorëve që përdorin internetin për të dëmtuar fëmijët.
Ambasada theksoi se mbrojtja e fëmijëve nga kërcënimet online është një nga përgjegjësitë më të mëdha në një kohë kur rreziqet në hapësirën digjitale janë në rritje. Sipas saj, aftësitë e fituara gjatë këtij trajnimi do të ndihmojnë autoritetet shqiptare të forcojnë kapacitetet për të identifikuar, hetuar dhe ndjekur penalisht rastet e shfrytëzimit kibernetik.
Ky bashkëpunim konsiderohet një hap i rëndësishëm në rritjen e profesionalizmit të institucioneve shqiptare dhe në forcimin e sigurisë së fëmijëve në mjedisin online.
