Presidenti i Kinës, Xi Jinping, dhe homologu i tij rus, Vladimir Putin, zhvilluan një bisedë telefonike në prag të përvjetorit të katërt të nisjes së luftës në Ukrainë, duke riafirmuar marrëdhëniet e ngushta mes dy vendeve në një moment të tensionuar gjeopolitik global.
Sipas mediave shtetërore ruse, Putin theksoi se bashkëpunimi mes Moskës dhe Pekinit është një faktor i rëndësishëm stabiliteti në arenën ndërkombëtare dhe se marrëdhënia dypalëshe po forcohet pavarësisht presioneve dhe sanksioneve nga vendet perëndimore.
Nga ana e tij, Xi Jinping u shpreh se ka ardhur koha për hartimin e një “plani të madh strategjik”, me synim thellimin e partneritetit mes dy vendeve në fusha kyçe si politika, ekonomia dhe siguria. Ai vlerësoi se marrëdhëniet kino-ruse kanë treguar qëndrueshmëri dhe kanë përballuar me sukses tronditjet ndërkombëtare.
Partneriteti strategjik mes Kinës dhe Rusisë u shpall pak ditë para nisjes së ofensivës ruse në Ukrainë në vitin 2022, duke ndikuar ndjeshëm në ekuilibrat globalë. Që prej asaj kohe, Kina është shndërruar në një nga partnerët më të rëndësishëm ekonomikë të Rusisë, duke rritur ndjeshëm shkëmbimet tregtare dhe bashkëpunimin energjetik.
Gjatë bisedës, dy liderët diskutuan gjithashtu për koordinimin e mëtejshëm në çështje që lidhen me interesat strategjike të të dyja vendeve, ndërsa Xi u zotua se Pekini do të vazhdojë të punojë ngushtë me Moskën në arenën ndërkombëtare.
Telefonata vjen në një moment simbolik, pak ditë përpara përvjetorit të luftës në Ukrainë, duke dërguar një sinjal të qartë për vazhdimin dhe forcimin e boshtit politik mes Kinës dhe Rusisë, pavarësisht izolimit ndërkombëtar të Moskës nga Perëndimi.
