Presidenti rus Vladimir Putin nuk do të marrë pjesë në mbledhjen e radhës së G20 në Bali, ku do të takohen liderët e disa shteteve.
Presidenti i Rusisë do të përfaqësohet nga ministri i jashtëm Sergei Lavrov. Lajmin e ka bërë me dije ambasada e Moskës në Indonezi, ku konfirmoi se Putin nuk do të merrte pjesë.
“Mund të konfirmoj se (ministri i Jashtëm) Sergei Lavrov do të udhëheqë delegacionin rus në G20. Programi i Presidentit Putin është ende duke u përpunuar, ai mund të marrë pjesë virtualisht”, tha Yulia Tomskaya, shefja e protokollit të ambasadës.
Si mikpritëse e G20-ës, Indonezia i ka rezistuar presionit nga vendet perëndimore dhe Ukraina për të tërhequr ftesën e saj për Putinin nga samiti i liderëve.
