Presidentja e Kosovës, Vjosa Osmani, në Ditën kundër Trafikimit të Njerëzve ka deklaruar se trafikimi i qenieve njerëzore përbën jo vetëm krim të rëndë, por edhe sfidë të vazhdueshme e shqetësuese të shoqërisë.
Osmani, gjithashtu kërkoi edhe anëtarësimin e Kosovës në Interpol dhe në Këshillin e Evropës, pasi sipas saj, këto anëtarësime do të ndikonin në bashkërendimin e mirë me vendet e tjera për ruajtjen e një ambienti të sigurt dhe në luftimin e dukurive të tilla.
“Anëtarësimi në Inteprol dhe Këshillin e Evropës do të vuloste përpjekjet tona për luftim të krimit të organizuar dhe rrjetit të trafikantëve në të gjithë Ballkanin Perëndimor. Anëtarësimi në Këshillin e Evropës do të fuqizonte përpjekjet tona për përparim të mëtejmë, duke i dhënë përparësi edhe miratimit të masave e procedurave të veçanta për identifikimin e viktimave të trafikimit dhe ofrimin e ndihmës së duhur”, është shprehur Osmani.
Më tej, ajo tha se nuk mundet askush të jetë kundër krimit të organizuar e kundër Kosovës në Interpol.
“Pra nëse dikush është kundër krimit të organizuar, duhet të jetë pro Kosovës në Interpol. Nëse dikush është pro të drejtave të njeriut, duhet të jetë pro Kosovës në Këshillin e Evropës”, tha Osmani.
