Askush nuk priste që pinguinët të mbanin barrën e “Ditës së Çlirimit”.
Por midis breshërisë së tarifave të vendosura nga Donald Trump, SHBA-ja gjithashtu mori në shënjestër ishujt e pabanuar, foli për mish viçi amerikan dhe ktheu hundën drejt vezëve plastike.
Territoret e vogla goditen me tarifa të mëdha
Në pamje të parë bien në sy tarifat e reja të vendosura për vende si Kina, Bashkimi Evropian, India dhe Britania e Madhe – që variojnë respektivisht nga 34% në 10%.
Por presidenti vendosi gjithashtu tarifa në dhjetëra territore të vogla – disa prej të cilave nuk kanë as banorë njerëz.
Një prej tyre ishin Ishujt Heard dhe McDonald, një territor i jashtëm i Australisë në Antarktik që banohet vetëm nga pinguinë dhe foka.
Pavarësisht se nuk ka banorë njerëz – ose importe dhe eksporte – ishulli tani përballet me një tarifë prej 10% për çdo mall të destinuar për në SHBA.
Territori australian Norfolk Island, një ishull vullkanik 600 milje në lindje të Queensland, u godit gjithashtu me një tarifë të madhe prej 29% për eksportet në SHBA. Kjo është shumë më e lartë se Australia kontinentale, e cila kishte një tarifë prej 10%.
Lajmi u prit me konfuzion nga disa prej 2,188 banorëve të ishullit Norfolk.
“Ishulli Norfolk është një pikë e vogël në botë,” tha të enjten Richard Cottle, pronar i një biznesi të përzierjes së betonit në ishull.
Megjithëse ishulli dërgon një sasi modeste të farave të palmës Kentia jashtë vendit, kjo zakonisht vlen më pak se 1 milion dollarë (760,000 £) në vit, me produktet kryesisht në Evropë.
“Mishi ynë është i bukur, i tyre është i dobët”
Pas shpalljes së një tarife prej 20% kundër Bashkimit Evropian, sekretari i tregtisë i zotit Trump, Hoëard Lutnick foli me Fox Neës në përpjekje për të shpjeguar se çfarë fshihej pas vendimit.
Në një fjalë të shkurtër, por të çuditshme, zoti Lutnick foli për ndalimin e bllokut të pulave të importuara nga SHBA.
“Dua të them që Bashkimi Evropian nuk do të marrë pulën nga Amerika,” tha ai.
“Ata do të marrin karavidhe nga Amerika… ata e urrejnë viçin tonë, sepse viçi ynë është i bukur dhe i tyre është i dobët”.
BE-ja ka një ndalim për pulën e larë me klor – një praktikë që është miratuar nga Departamenti i Bujqësisë i Shteteve të Bashkuara.
Edhe pse viçi amerikan nuk është plotësisht i ndaluar në Evropë, çdo mish viçi që është trajtuar me hormone artificiale të rritjes – i cili është i ligjshëm në SHBA dhe i zakonshëm midis prodhuesve – është i ndaluar nga BE.
Kombet më të varfra në botë përballen me tarifat më të larta
Shumë nga tarifat e zotit Trump kanë shënjestruar vendet më të varfra në botë.
Lesoto në Afrikën Jugore, i renditur si vendi i 22-të më i varfër në botë, është goditur me taksën më të lartë prej 50%. Kryesisht eksporton diamante dhe veshje, me SHBA-në si një nga pesë destinacionet kryesore eksportuese, raportoi rrjeti partner amerikan i Sky Neës NBC Neës.
Tarifa e dytë më e lartë shkoi në Kamboxhia me 49%, edhe pse SHBA është destinacioni më i madh i eksportit në Kamboxhia.
Madagaskari në Afrikën Lindore, vendi i nëntë më i varfër në botë, do të përballet me tarifa reciproke prej 47%. Kryesisht eksporton vanilje, karafil dhe veshje, me SHBA-në ndër pesë vendet kryesore në të cilat eksporton, sipas NBC.
‘A mund të përdorni vezë plastike?’
Në një pjesë tjetër të fjalimit të tij të gjerë, zoti Trump u fut në temën e vezëve – çmimi i të cilave arriti një nivel më të lartë të të gjitha kohërave në fillim të këtij viti në SHBA për shkak të shpërthimit të gripit të shpendëve.
Të mërkurën, zoti Trump konfirmoi se tradita vjetore e Shtëpisë së Bardhë për rrotullimin e rreth 30,000 vezëve të Pashkëve nëpër lëndinën e Jugut pritet të vazhdojë dhe do të përdorë vezë të vërteta, pavarësisht lutjeve që në vend të tyre të përdoren ato plastike.
“Ata thoshin që për Pashkë ‘Ju lutemi mos përdorni vezë. A mund të përdorni vezë plastike?” Unë them, ne nuk duam ta bëjmë këtë”, tha zoti Trump.
Ai nuk sqaroi se kush po i thoshte të mos përdorte vezë të vërteta.
