Pas sulmit të papranueshëm ndaj flamurit kombëtar në Suharekë, një tjetër akt i turpshëm ka tronditur shqiptarët në Kosovë. Shtatorja e Gjergj Kastriotit – Skënderbeut në qytetin historik të Prizrenit është përdhosur, ku përkrenarja dhe shpata e heroit kombëtar u ngjyrosën me ngjyrë ari.
Shoqata “Trojet e Arbrit” reagoi ashpër, duke dënuar këtë veprim si një sulm të shëmtuar dhe të qëllimshëm ndaj figurës më të ndritur të historisë kombëtare shqiptare. Kryetari i shoqatës, Mr. Sc. Nue Oroshi, përmes një postimi në Facebook bëri thirrje urgjente për veprime të menjëhershme nga institucionet e sigurisë dhe drejtësisë në Kosovë, duke kërkuar ndëshkimin e autorëve.
“Ky është një provokim i papranueshëm që cenon krenarinë tonë kombëtare dhe trashëgiminë e Skënderbeut, simbolit të rezistencës dhe bashkimit shqiptar,” theksoi Oroshi.
Policia Rajonale e Prizrenit njoftoi se po heton ngjarjen dhe se zona është e mbuluar nga kamera sigurie, gjë që pritet të ndihmojë në identifikimin e vandalëve.
Shtatorja e Skënderbeut, e vendosur më 28 nëntor 2020 në rrethrrotullimin e rrugës “Hasan Prishtina”, është një monument i shenjtë për qytetin dhe gjithë shqiptarët, si një kujtesë e fuqishme e heroinës dhe përpjekjeve për liri.
Ky akt i turpshëm na bën të reflektojmë se sa e rëndësishme është ruajtja dhe nderimi i simboleve tona kombëtare. Është koha që çdo shqiptar të ngrejë zërin dhe të qëndrojë në krah të vlerave tona, sepse Skënderbeu nuk është vetëm një emër i kaluarës, por një frymëzimi për të ardhmen tonë të përbashkët.
Materialet e publikuara nga “Diaspora Shqiptare” janë të mbrojtura nga të drejtat e autorit. Rishpërndarja, riprodhimi, modifikimi apo përdorimi i tyre, i pjesshëm ose i plotë, pa lejen e shprehur të redaksisë, është i ndaluar dhe shkel ligjet mbi të drejtat e pronës intelektuale.
