Dosja për shpalljen “non grata” të ish-kryeministrit Sali Berisha është dorëzuar në Kongresin Amerikan. Departamenti Amerikan i Shtetit më 19 maj e shpalli atë të padëshiruar, por dosja tashmë ka marrë vulën e Kongresit. Njoftimi është bërë nga vetë DASH, i cili në faqen e vet të internetit ka publikuar listën e emrave të shpallur “non grata” që janë dërguar në Kongres. Sipas nenit 7031/c, Sekretari i Shteti e ka për detyrim që vendimin ta dorëzojë në Kongres me të gjitha të dhënat dhe argumentet.
“Jo më vonë se 30 ditë nga miratimi i këtij akti dhe çdo 90 ditë pasardhëse, Sekretari i Shtetit do të paraqesë një raport në të cilin nëse shihet e nevojshme do të përfshihet një aneks i klasifikuar drejtuar komiteteve përkatëse të Kongresit dhe komisioneve për gjyqësorin. Në këto anekse do të përshkruhet informacioni i lidhur me korrupsionit ose me dhunimin e të drejtave të njeriut në lidhje me secilin prej individëve të shpallur të papërshtatshëm në 12 muajt paraardhës në përputhje me paragrafin (1) (A) si dhe individët të cilët Sekretari i Shtetit i ka përcaktuar ose identifikuar si të përputhshëm me paragrafin (1)”, theksohet aty.
Në kuadër të këtij përcaktimi, tashmë që kanë kaluar më shumë se 3 muaj nga vendimi, Blinken ka dorëzuar dosjen në Kongres për Berishën, bashkëshorten e tij, si dhe për vajzën dhe djalin tij. Ajo që bie në sy është se Sali Berisha ndodhet në një listë me një grup zyrtarësh nga Bullgaria, Paraguai, Namibia dhe nga Guatemala. Në listën në fjalë është Boris Roberto España Caceres, deputet nga Guatemala, i cili u shpall i padëshiruar për përfshirje në korrupsion dhe minim të proceseve demokratike. Po ashtu në listë janë Bernardt Esau dhe Sakeus Shanghala nga Namibia. Të dy akuzohen se kanë kryer afera të mëdha korrupsioni kur kanë qenë ministra.
Gazeta ka siguruar të plotë nenin 7031/c, në bazë të të cilit u shpall i padëshirueshëm Berisha. Bëhet fjalë për një nen të përcaktuar në ligjin për buxhetin. Në këtë nen nuk flitet në asnjë direktivë të tij për fakte. Aty përcaktohet fare qartë se Sekretari i Shtetit ka të drejtë të shpallë të padëshirueshëm këdo zyrtar të huaj, për të cilin ai ka informacion të besueshëm se është i përfshirë në korrupsion apo shkeljen e të drejtave të njeriut. Pra neni e ka bërë të qartë se vendimi nuk merret mbi bazë provash, por vetëm mbi bazë informacionesh dhe vetë DASH kështu shprehet në reagim. Madje një tjetër përcaktim që rëndon pozitat e Berishës është se aty flitet për korrupsion direkt, por dhe për korrupsion indirekt.
“Zyrtarët e qeverive të huaja dhe anëtarët e familjes së tyre, për të cilët Sekretari i Shtetit ka informacion të besueshëm se janë të përfshirë direkt apo indirekt në korrupsion të rëndësishëm, përfshi edhe për nxjerrjen e burimeve natyrore, apo shkeljen e të drejtave të njeriut, u ndalohet hyrja në SHBA. Sekretari informon gjithashtu publikisht ose privatisht zyrtarët e qeverive të huaja dhe anëtarët e afërt të familjes, për të cilët ka informacion të besueshëm, pavarësisht nëse kanë aplikuar apo jo për vizë”, thuhet në ligj.
Më tej përcaktohet se është po vetë Sekretari ai, i cili vendos të tërhiqet nga ky vendim, por kjo vetëm në dy aspekte. Së pari nëse heqja e penalizimit për individin do të sjellë interesa të mëdha kombëtare për SHBA ose me kalimin e kohës kanë ndryshuar rrethanat për përfshirjen e individit në fjalë në korrupsion. Pra me pak fjalë, vendimi i marrë nga Departamenti i Shtetit më 19 maj të këtij viti, pritet të mos ndryshojë për një kohë shumë të gjatë, pavarësisht tentativave të ish-kryeministrit për të paditur zotin Blinken.
