Presidenti demokrat Joe Biden renditet pas kandidatit kryesues republikan Donald Trump në pesë nga gjashtë shtetet më të rëndësishme për betejën elektorale, një vit përpara mbajtjes së zgjedhjeve në Shtetet e Bashkuara. Sondazhet e publikuara të dielën duken si një reflektim i pakënaqësive në mesin e amerikanëve lidhur me moshën e Presidentit Biden apo gjendjen e ekonomisë.
Anketimet u bënë nga gazeta The New York Times dhe Kolegji Siena. Zoti Trump, i cili kryeson ndër kandidatët republikanë për të marrë emërimin si kandidat i kësaj partie për vitin 2024, kryeson në Arizona, Xhorxhia, Miçigan, Nevada dhe Pensilvani, ndërsa Presidenti Biden kryeson në Uiskonsin. Presidenti Biden e mundi ish-Presidentin Trump në të gjashta këto shtete në zgjedhjet e vitit 2020. Zoti Trump merr tashmë mesatarisht nga 44 – 48% mbështetje në këto shtete, thuhet në anketime.
ÇFARË NËNKUPTOJNË KËTO REZULTATE?
Megjithëse anketimet që masin nivelin e mundshëm të votave në nivel kombëtar kanë treguar vazhdimisht një garë të afërt mes zotit Biden dhe zotit Trump, zgjedhjet presidenciale normalisht përcaktohen nga rezultatet në disa shtete, të mbiquajtura të lëkundura.
Fitorja e zotit Biden në Arizona, Xhorxhia, Miçigan, Pensilvani dhe Uiskonsin – të gjitha shtete të lëkundura ku pati fituar zoti Trump në vitin 2016 – ishte vendimtare për fitoren e tij në vitin 2020. Zotit Biden do t’i duhet ndoshta të fitojë në disa prej këtyre shteteve për të siguruar rizgjedhjen.
REAGON FUSHATA ELEKTORALE E PRESIDENTIT BIDEN
“Parashikimet e një viti më parë duken zakonisht më ndryshe një vit më pas. Mos pranoni thjesht fjalën tonë për këtë: Gallup parashikoi një humbje prej 8% për Presidentin Obama, ndërkohë që ai fitoi bindshëm një vit më vonë”, u shpreh në një deklaratë zëdhënësi i fushatës elektorale të Presidentit Biden, Kevin Munoz, duke iu referuar fitores së demokratit Barack Obama në vitin 2012, përballë republikanit Mitt Romney.
Zoti Munoz shtoi se fushata elektorale e Presidentit Biden “po punon shumë për të angazhuar dhe mobilizuar bazën tonë të shumëllojshme dhe fitimtare të votuesve, një vit më herët përpara zgjedhjes mes axhendës sonë fitimtare popullore, dhe ekstremizmit jopopullor të republikanëve të MAGA-s (Lëvizja e ish-Presidentit Trump: “Ta bëjmë Amerikën sërish madhështore”). Ne do të fitojmë në 2024-n duke ulur kokën dhe duke punuar, dhe jo duke u shqetësuar nga një anketim”.
