Një tjetër emër i është bashkuar garës për kryebashkiak të Durrësit, në zgjedhjet e pjesshme vendore që do të mbahen në 6 mars.
Krahas kandidatëve të publikuar tashmë dhe zyrtarizuar Emiriana Sako (PS), Luan Hoti (PD-Basha) dhe Ardian Muka (Shtëpia e Lirisë), garës i është bashkuar edhe Jonid Nano, i cili do të garojë në siglën e LRE.
Në formularin e dorëzuar për regjistrim në KQZ, kandidati i LRE figuron me emrin Jonid, ndërsa në posterin elektoral të partisë së tij shfaqet me emrin Jani Nano.
Ai mban postin e sekretarit organizativ të LRE dhe është anëtar kryesie i saj, ndërkohë që është një emër i njohur në sportin e boksit, ku disa herë ka qenë trajner i ekipit kombëtar. Që nga viti 2020 ai është kryetar i Komisionit të Boksit Profesionist.
Ka qenë vetë kreu i LRE-së, Arian Galdini, që përmes një postimi në rrjete sociale ka njoftuar përfshirjen e Nanos në garën për kreun e bashkisë Durrës.
“Sot merr udhë kandidimi zyrtar për Kryetar Bashkie në Durrës i Jani Nano si edhe i Dritan Torba për Kryetar Bashkie në Dibër.
Besoj se ia kemi dalë.
Duhet vetëm të presim proçedurat formale në KQZ dhe vendimin e KQZ për 2 kandidatët tanë”, shprehet Galdini.
