Ergys Muzhaqi, ekspert sigurie thotë se publikimi i dokumenteve të tjera nga skedarët e policisë vë në rrezik jetën e efektivëve dhe ish-efektivëve të policisë.
Në një intervistë për Euronews Albania eksperti u shpreh se goditja e sistemit të sigurisë do të thotë rënie e shtetit.
Sipas Muzhaqit, pas ndërhyrjes së hakerave në sistemin ‘Memex’ të policisë, çdo efektiv apo ish-efektiv është i ekspozuar ndaj elementëve kriminalë që tashmë kanë në dorë çdo informacion.
“Efektivët dhe ish-efektivët e policisë janë të ekspozuar ndaj botës krimit pasi do t’u dalin emrat e agjentëve që kanë dorëzuar informacionet. Kam punuar me sistemin Memex, e mbledhin dhe më pas e depozitojnë në sistem informacionin. Duhet arrestuar i gjithë zinxhiri përgjegjës për shkatërrim të sigurisë kombëtare. Sot me ekspozimin e informacionit është hyrë tek dyert dhe sekretet e të gjithëve.
‘Homeland Justice’ ka publikuar dokumente të tjera nga skedarët e policisë.
Gazetari Eni Ferhati sqaron se janë publikuar të dhëna të personave që dyshohet se janë të përfshirë në ngjarje kriminale.
Në dokumente shfaqen të dhënat e personave si emër, mbiemër dhe foto.
Dyshohet se hakerat mund të jenë futur në sistemin Memex, në të cilin ka të dhëna shumë sensitive.