Kuvendi i Republikës votoi në seancën e sotme dy anëtarët e rinj të Gjykatës Kushtetuese, ndërsa ato janë Elsa Toska dhe Fiona Papajorgji. Elsa Toska ka marrë votat e 105 deputetëve të pranishëm në Parlament, 2 vota kundër dhe 9 vota abstenim, kurse Fjona Papajorgji mori 105 vota pro, 3 kundër dhe 8 vota abstenim.
Ambasada e Shteteve të Bashkuara në Tiranë ka reaguar pas zgjedhjes së dy anëtarëve të rinj të Gjykatës Kushtetuese. Ajo e ka përshëndetur këtë veprim të Kuvendit, ndërsa shton se organet e reja të pavarura të gjyqësorit, kanë punuar fort për të përmbushur vullnetin e popullit. Më tej në reagim thuhet se “Shtetet e Bashkuara mbeten të përkushtuara për të mbështetur ngritjen e një sistemi gjyqësor të pavarur dhe të ndershëm në Shqipëri.
Reagimi i ambasadës së SHBA:
“Prej votimit unanim të reformës në drejtësi në 2016-ën, institucionet shqiptare, përfshirë edhe organet e reja të pavarura të gjyqësorit, kanë punuar fort për të përmbushur vullnetin e popullit. Votimi i sotëm i Parlamentit çon Shqipërinë përpara në ringritjen e Gjykatës Kushtetuese, një organ jetësor për llogaridhënien dhe ekuilibrat demokratike. Shtetet e Bashkuara mbeten të përkushtuara për të mbështetur ngritjen e një sistemi gjyqësor të pavarur dhe të ndershëm në Shqipëri”-shkruan ambasada.
Edhe delegacioni i BE në vendin tonë ka përshëndetur procesin, e kuvendit i cili ka votuar këtë të hënë për dy anëtarëve të rinj të Gjykatës Kushtetuese.
Përmes një postimi në profilin e saj në Twitter, delegacioni i BE shkruan se presin krijimin e një Gjykatë funksionale sa më shpejt që të jetë e mundur.“Sot Parlamenti shqiptar zgjodhi dy anëtarë të rinj të Gjykatës Kushtetuese. Ne e mirëpresim këtë vendim dhe presim krijimin e një Gjykatë funksionale sa më shpejt që të jetë e mundur. Zbatimi i reformës në drejtësi vazhdon dhe është thelbësor për Shqipërinë në rrugën e saj të integrimit në BE”.
