Kryeministri i Malit të Zi, Dritan Abazoviç është shprehur i gatshëm që të japë dorëheqje nga posti që mban. Deklaratat e tij u bënë gjatë një interviste televizive, ndërsa partia Mali i Zi Demokratik tha se ai do të duhej ta bënte këtë sapo të përfundojë procesi i zgjedhjeve të organeve të drejtësisë.
Abazoviç tha se në parim e mbështet qëndrimin e Kryesisë së Malit të Zi Demokratik, që i bëri thirrje Kuvendit të mos shqyrtojë iniciativat e mundshme për shkurtimin e mandatit para se të zgjidhen katër anëtarë të Këshillit Gjyqësor dhe së paku një gjyqtar i Gjykatës Kushtetuese.
“Të gjithë duhet të kemi një konsensus më të gjerë për zhbllokimin e gjyqësorit, të Gjykatës Kushtetuese. Le të kontribuojmë të gjithë për këtë dhe të themi: ‘Mirë, po shkojmë në zgjedhje të reja. Por para kësaj, le të bëjmë një punë të përbashkët. Nëse kolegët demokratë, nëse e kam interpretuar saktë njoftimin, mendojnë kështu, unë jam gati të jap dorëheqjen”, tha Abazoviç për “Vijesti”.
Abazoviç është kritikuar kohët e fundit nga partitë në Mal të Zi, edhe nga partnerët qeveritarë. Po ashtu ka humbur besimin në Kuvend të partisë së presidentit Milo Gjukanoviç për shkak të marrëveshjes për themelimin e Kishës ortodokse serbe në Mal të Zi. Po ashtu u kritikua gjerësisht edhe për deklaratën në lidhje me gjenocidin e Srebrenicës.
Gazetari Armand Shkullaku ka komentuar reagimin e ministrit të Drejtësisë Ulsi Manja, të parin nga ai lidhur me aferën e inceneratorëve pas disa javësh denoncime dhe dëshmi të forta.
Ai shprehet i habitur se si ministri i drejtësisë mund të flasë “budallallëqe” kur miliona euro janë zhdukur.
“Ministri i Drejtësisë i një shteti serioz nuk do të duhej të flinte gjumë. Ngrihen dy Klodë dhe rrafshojnë buxhetin e shtetit. Zoti Manja nuk është i shqetësuar p.sh. pse duhet të bëhet reklamë në media një kompani që djeg plehrat. Mirë prokurorët nuk marrin vesh nga financat e bankat, po këtë reklamën e shohin ata? Mirë, nuk e kape transaksionin se je i trashë. Po këtë reklama në TV nuk të ngre pyetje? As Eskobari nuk bëri dot kaq lekë në aq pak kohë. Vetëm në Shqipëri ndodh që ministri i Drejtësisë të mos ketë pikën e cipës dhe të dalë e të flasë budallallëqe, në një kohë kur këtu kanë avulluar qindra miliona euro!”– deklaroi sot Shkullaku, ndërsa ishte i ftuar në programin “Të Paekspozuarit në “MCN TV”.
Ky koment vjen pas reagimit të parë zyrtar të ministrit Ulsi Manja për inceneratorët, i cili në një postim në rrjetet sociale, nuk u mor me vjedhjen por me një përgjigje politike për presidentin Ilir Meta.
“Ulëritëse është që Ilir Meta vazhdon ndot dynjanë, ndërkohë që emrat e të vdekurve me të cilët ai luan për të ulëritur, janë nxjerrë nga dosjet e çuara në prokurori prej vitesh nga hetimi tatimor! Po diçka tjetër ia prish gjumin Ilir Metës, dhe nuk ka faj i shkreti…”– shkruante Manja në Facebook.
Ky koment i parë i ministrit të drejtësisë për çështjen e inceneratorëve, pas disa javësh denoncimesh të forta, erdhi pasi kreu i shtetit kritikoi institucionet për qëndrimin në raport me këtë aferë duke ngritur pikëpyetje mbi sistemin bankar që pranon firma nga njerëz që nuk jetojnë. Meta iu referua rastit të një zonje të moshuar që ka ndërruar jetë 5 vite më parë, emri i të cilës ishte përdorur në skemën e inceneratorëve, ku transaksione prej 5 deri në 6 milionë euro ishin kryer në emër të saj./Hashtag.al
