Shqiptarët sot po përballen me një rritje të shpejtë të ushqimeve. Atë që po ndodh tashmë në treg po e reflektojnë edhe shifrat zyrtare të Instat pasi inflacioni arriti në 2.4%, ndikuar kryesisht nga shtrenjtimi i çmimit të karburanteve dhe artikujve ushqimorë. Kjo padyshim rëndon më shumë xhepat e shqiptarëve që çojnë rreth 38% të shpenzimeve të tyre për ushqime.
Shqiptarët kanë paguar më shumë edhe për karburant pasi çmimet e grupit të transportit luhatën me 4.3%, teksa u vu re një rritje edhe për çmimet e pagesave të qirasë, ujit dhe energjisë elektrike si dhe për restorante e kafene. Kostot janë rritur më tej edhe për mobilimin e shtëpive.
Mes grupit të ushqimeve dhe pijeve alkoolike që u rritën me 4.6% më shumë se një vit më parë, shtrenjtimin më të madh e kanë parë zarzavatet dhe frutat, teksa janë rritur ndjeshëm edhe çmimet e produkteve të bulmetit, vajrave e yndyrave si dhe bukës që së fundmi konsumatorët po e blejnë 10 lekë më shumë.
Teksa kostot e jetesës po rriten me shpejtësi të madhe, pagat ngelen në vend. Për ekspertët as rritja e pagës në 30 mijë lekë më e madhja që prej 2008-ës nuk dha efekt në konsum për shkak të goditjes që mori tregu i punës. Sipas Top Channel, teksa efektet e pandemisë vijojnë të jenë ende prezente, ekspertët janë skeptik për një përmirësim të situatës dhe një gjallërim të konsumit dhe punësimit në një periudhë afatshkurtër.
