AIDSSH pretendon se Meta është spiun i Sigurimit. Por ky i fundit e paditi në SPAK. Sipas informacioneve, prokuroria e Posaçme ka shpallur moskopetencë dhe e ka dërguar dosjen në Prokurorinë e Tiranës. Ajo është marrë në shqyrtim nga prokurori Arben Agovi.
Meta e ka paditur Autoritetin e Dosjeve për shpërdorim detyre. Por prokurori nga verifikimet që ka bërë e ka gjetur të pabazuar kërkesën e Metës dhe ka dërguar kërkesë në Gjykatën e Tiranës, për mosfillimin e procedimit penal.
Vetë Meta ka refuzuar të marrë dosjen dhe të bëjë transparencë, por vendosi të bëjë një padi.
“Autoriteti ka marrë shtatë vendime brenda një dite, kur në një procedurë normale do t’i duheshin 6 muaj. Ai ka hetuar në shkelje të ligjit ndaj një zyrtari, që ka disa certifikata pastërtie, pa asnjë kërkesë zyrtare, por i urdhëruar nga një email anonim”, tha Meta pak javë më parë.
Vetë Autoriteti i Dosjeve ka reaguar disa herë duke thënë se kanë zbatuar me korrektësi detyrën. Sipas tyre Meta po ushtron presion.
“Çdo veprimtari e Autoritetit është e bazuar në akte ligjore dhe nënligjore, në vendimmarrje kolegjiale, e shoqëruar me dokumentacion të protokolluar, lehtësisht e verifikueshme në çdo kohë. Autoriteti siguron qytetarët shqiptarë për standardin maksimal të sigurisë së dokumentacionit të administruar prej tij”, shprehej AIDSSH.
Rrëzimi i padisë vjen në një kohë kur PS dhe PD do miratojnë ligjin për të hapur dosjen e ish-presidentit. Si duket se telashet e vjetra i janë kthyer kreut të Partisë së Lirisë.
