Gazetari i njohur Ylli Rakipi, ka depozituar ditën e sotme një kundërpadi ndaj kryeministrit Edi Rama, në Gjykatën e Tiranës.
Mes Rakipi e Ramës ka kohë që vazhdojnë akuzat e rënda, edhe për korrupsion.
Rama e ka paditur gazetarin për cënim të dinjitetit, për këtë arsye gazetari Rakipi ka depozituar deklaratën e mbrojtjes dhe një kundërpadi.
Gazetari Ylli Rakipi i konsideron veprimet e kryeministrit ndaj tij, një përpjekje për ta intimiduar dhe për të ushtruar presion mbi të dhe emisionin që ai drejton, “Të Pakespozuarit”.
Rakipi ka thënë për mediat se kryeministri Rama, ka fyer dhe nëpërkëmbur dinjitetin e tij, për shkak të kritikave dhe ekspozimit të aferave korruptive të qeverisë dhe la të kuptohet se këto ditë do ketë të tjera akuza për afera korruptive te familjes Rama.
“Unë kam depozituar një kundërpadi sepse ai ka fyer dhe nëpërkëmbur dinjitetin tim, sa ka mundur dhe si ka mundur. Është rast i cuditshëm kur shkon në gjyq njeriu më gojështhurur që nga viti 1912. E keni ndjekur fjalorin që përdor për gazetarët, çfarë ai thotë dhe çfarë deklaron. Ky gjyq është politik, është përpjekje e vazhdueshme e Ramës që unë të mbyll emisionin “Të Paekspozuarit”, i cili ka goditur aferat dhe koncesionet e qeverisë. Unë dua t’ju them, se kjo është një padi e ngritur nga regjimi, i cili thjesht ndryshon në formë nga diktaturat e mëparshme. Nuk është si regjim i Hitelit apo Hoxhës, por është regjim që të privon lirinë. Demokraci do të thotë të mundesh. Ky njeri i ka vënë fre gjithçkaje, ble mediat dhe ka nën kontroll të gjithë pushtetet e vendit. Për kundërpadinë ndaj kryeministrit Rama, do t’ju kërkojë autoriteteve që gjyqi të vijojë me dyer të hapura për mediat. Vetëm një gjykatë e Recep Taip Erdogan mund të më dënojë, me padinë që ka bërë Edi Rama ndaj meje. Besoj tek drejtësia dhe besoj se ka njerëz të ndershëm që nuk mund të japin verdikte të gabuara, si ky rast që ju do ta ndiqni. Media ka probleme të panumërta, por nuk është kryeminisri ai që rregullon dhe kontrollon mediat. Rama është një diktator i llojit të ri, si Erdogan apo Putin, nuk ndryshon nga ta“, deklaroi Rakipi.
