Asgjë e re në horizont

Nga

25 Shkurt 2024

Shkruan Mimoza Rexhvelaj

Asgjë e re në horizont

Asgjë e re në retinën e syve të mi

Veç fishkëllimës së fletës që kthehet,

Një monotoni flakëruese

Me avuj sokakësh dehet.

Meridianë të humbur

Si jastekë gjithë pluhur,

Sa e Anteut gjurma ime

E krahët e lehtë, si flutur.

Pentagrami i jetës sime përshkon kthesën e radhës

Me gjethe pa krahë por të fluturojnë dinë,

Minutat në vakum sajojnë katërorë të imët

Në një liman të zbrazët dikur mbrrijnë…

Ora mban frymën me ritmin e zemrës

Tinguj trishtimi buzëqeshjen ma dhunojnë,

Cepat e buzëve të etshme për puthje

Zot, më thuaj, si mund t’i durojmë?

E thënë tjetërsi

Në horizont shoh vetëm prapësi!