Kryeministri Edi Rama është pyetur sot nga gazetarët lidhur me njoftimin e bërë nga Ministria e Jashtme për njoftimin e bërë pak ditë më parë për nisjen e procedurave për zëvendësimin e Ambasadores Yuri Kim.
I pyetur se përse kjo ministri ka bërë një deklaratë të tillë, duke thyer etikën, Rama tha se nuk është thyer etika, ndërsa shtoi se është komentuar vetëm për ambasadoren e SHBA pasi sipas tij “me SHBA kemi një marrëdhënie të veçantë”.
Rama tha se procedura për zëvendësimin e saj kanë nisur, ndërsa ditën e sotme vetë ambasadorja konfirmoi se ajo do të qëndrojë më gjatë.
“Nuk është thyer asnjë etike dhe procesi për zëvendësimin ka nisur siç është thënë nga Ministria e Jashtme, e ka nisur Departamenti i Shtetit jo ne”, u shpreh Rama.
Por pse ky njoftim është bërë vetëm për ambasadoren e Amerikës?
“Sepse Amerikën e kemi të veçantë nuk komentojmë për të gjithë ambasadorët dhe sikur ta’, u përgjigj Rama.
I pyetur nëse mes tyre ka një krisje të marrëdhënieve, Rama tha: Ngjitja mes meje dhe ambasadores është më e fortë se kurrë nëse mund ta përdorim me metaforë, dje kemi pasur një takim të gjatë konstruktiv, miqësor.
