Shkruan Andi Bushati
Ndërkohë që opozita dhe opinioni publik po kërkojnë me ngulm spjegime shteruese nga kryeministri për lidhjen e tij me ish zyrtarin e arrestuar të FBI, “The Washington Post” ka publikuar, këtë të hënë, shkrimin më të ashpër për marëdhënien okulte mes tyre.
Sipas të përditshmes së famshme amerikane, McGonigal ka qenë i zhytur deri në fyt në një pakt sekret me Ramën. Përpos këtij konstatimi, gazeta vazhdon se Charles McGonigal, ka marrë para për të çuar përpara interesat e kryeministrit shqiptar.
Pra, sa më shumë ditë kalojnë, aq më i qartë bëhet ky skandal: shefi i qeverisë e ka përdorur agjentin e korruptuar të FBI, për luftën e brendëshme, që ka pasur si qëllim asgjesimin e rivalëve politikë. Këtu nuk ka më dyshime. Sado që Edi Rama dhe boritë e tij të propagandës të vazhdojnë të thonë se emri i kryeministrit përmendet pa shkak, plot 14 herë në aktakuzë, nga Tirana deri në New York e Uashington, mediat e pavarura dëshmojnë të kundërtën.
“New York Times” e thoshte fjalë për fjalë se McGonigal ndërmori hapa në dobi të këtij politikani”. CNN fliste për një “marëdhënie të fshehtë”, ndërsa, së fundi, Washington Post e përshkruan ish agjentin si të përfshirë deri në fyt në paktin sekret me Ramën.
Por, përpos këtij konfirmimi shkrimi i kësaj të hëne ka edhe një detaj interesant, që më shumë sesa për të shkuarën e raportit Rama McGonigal hedh dritë për sjelljen aktuale të kryeministrit dhe për hezitimin e tij për tu përballur publikisht me akuzat.
Shumëkujt i ka bërë përshtypje fshehja e Ramës ndaj interpelancës dhe mocionit për debat që kërkoi opozita në kuvend. Publikut i ka lënë gjithashtu një shije të keqe shfaqja e tij në intervista të negociuara, ku pothuajse nuk tha asnjë detaj më shumë.
Këtë gjë ka bërë edhe me gazetën e madhe amerikane. Rama, që nuk lë rast pa nxjerë kokën në dritaret e mediave të famshme botërore, ai që është i gatshëm të përveshë llërët në polemika dhe të bëjë lajm nga Londra, në Uashington e derin në Athinë, herë duke goditur ministren e brendëshme britanike, Suela Braverman, herë duke e quajtur Donald Trumpin “Turpi i njërëzimit” e herë duke i treguar grekëve se Akropolin e shpëtuan shqiptarët, i është shmangur pyetjeve të Washington Post. Madje është interesante se kur gazeta ka kërkuar të citojë versionin e qeverisë, këtë gjë nuk e ka bërë as i zakonshmi Endri Fuga. Po të lexohet shkrimi disa sqarime të thjeshta i jep Manjola Hasa.
Kronologjia datë pas date/ Si u rekrutua McGonigal për të goditur PD-në
Pra, Edi Rama jo vëtëm që i është shmangur implikimit personal, por ai ia ka ndaluar edhe drejtorit të tij të komunikimit që i përgjigjet përherë mediave të huaja ta bëjë këtë.
A mos nga frika se edhe Fuga që e shoqëron pothuajse gjithmonë Ramën, mund të përdoret nesër si dëshmitar? A ka të bëjë kjo me një strategji të këshilluar nga avokatët, se kryeministri duhet të flasë sa më pak për këtë çështje?
Apo e gjitha përbën një plan të përcaktuar komunikimi, për të thënë sa më pak për sa kohë askush nuk e di se ç’ka në dosjet e prokurorëve amerikanë?
Të gjitha këto pyetje janë të ligjshme të shtrohen sot kur magjistari i mardhënieve me gazetarët e huaj po iu shmanget atyre, madje ashtu sikurse na tregoi Washington Post i ka mbyllur gojën edhe zëdhënësit të vet zyrtar.
Ky detaj që nxori si padashje gazeta amerikane na dëshmon se sa të kota janë përpjekjet e opozitës për të bërë interpelanca ku del të përgjigjet Elisa, mocione për debat, që anullohen sepse gjoja i kërkon non grata, apo komisione hetimore që hidhen poshtë pa arsye. E vërteta është e thjeshtë: Rama nuk do të flasë për shqiptarët, sepse ende nuk di se ç’mund të kenë kundër tij amerikanët.
