Shkruan Zef Ndreka
Do përpiqem të paraqes një pasqyrë të zgjeruar mbi ndikimin që pritet të ketë shpërndarja në 4 grupe parlamentare në balancat e Kuvendit dhe stabilitetin politik.
Dominimi i PS.
PS ka shumicën absolute, 83 mandate dhe kontrollon plotësisht qeverinë e re. Kjo e bën atë relativisht të qetë për miratimin e ligjeve dhe buxhetit.
Megjithatë, fakti që opozita ka tre grupe të veçanta e rrit shumë zërin kritik në sallën e kuvendit.
Opozita do të ketë më shumë të drejtë fjale, më shumë deputetë në komisione, më shumë mundësi për interpelanca dhe mocione.
Sidoqoftë, PS do të qeverisë e sigurt, por nuk do ta ketë skenën e fjalës kaq të kontrolluar si në legjislaturën e kaluar.
Opozita do jetë më e fragmentuar, por më e pranishme.
Opozita, duke qënë me tre grupe parlamentare, nuk do të ketë unitet të plotë politik, por do ndjekë strategji institucionale.
Ndarja në disa grupe i jep fuqi proceduriale.
Në opinion publik, kjo mund të shihet si forcim i rolit opozitar, sepse ka më shumë zë.
Por në të njëjtën kohë, rreziku mbetet që për çështje të mëdha si reforma zgjedhore, lufta kundër korrupsionit, kontrolli parlamentar, mungesa e një qëndrimi unik mund të dobësojë kauzat opozitare.
Komisionet parlamentare.
Në komisionet parlamentare është vendi ku bëhet loja e vërtetë politike.
Çdo grup do të marrë vende në komisione. Me tre grupe, opozita do të mund të kontrollojë ose të paktën do të mund të udhëheqë disa komisione të rëndësishme si p.sh. Ekonominë, Mediat, Kontrollin e Financave Publike.
Kjo do t’i lejojë të ushtrojnë kontroll më të fortë mbi qeverinë dhe të prodhojnë raporte që i ekspozojnë abuzimet.
Balanca politike dhe stabiliteti.
Qeveria e PS ndjehwt e sigurt, dhe nuk do të ketë krizë numrash.
Stabiliteti politik varet nga mënyra si opozita do ti përdor instrumentet që do marrë në dorë.
Nëse opozita i përdor vetëm për zhurmë politike, do të krijohet polarizim i madh, por pa asnjë produkt konkret.
Nëse opozita i përdor për të imponuar transparencë dhe marrëveshje p.sh. për reformën zgjedhore, atëherë ky parlament mund të sjellë disa reforma kyçe të nevojshme e të domosdoshme për vendin.
Perspektiva për afatin e mesëm
Ky konfigurim mund ta bëjë Kuvendin shqiptar më të gjallë, më konfliktual dhe më të zëshëm.
Ka mundësi të rritet rol i opozitës si faktor presioni, jo për të rrëzuar qeverinë, por për ta detyruar atë të jetë më transparente dhe për të mos qeverisur në mënyrë të njëanshme.
Nëse opozita arrin të mbajë edhe një bashkëpunim minimal ndërmjet grupeve, atëherë kjo legjislaturë mund të shërbejë si bazë për riorganizimin e saj në zgjedhjet e ardhshme.
Pra, parlamenti i ri do të ketë një mazhorancë të fortë (PS), por një opozitë më të zëshme e të fragmentuar, që do të rrisë tensionin politik por edhe transparencën. Balanca do të jetë mes stabilitetit të qeverisë dhe dinamizmit të opozitës.
Ky funksionim i parlamentit të ri do të ishte rasti më i mirë për demokracinë.
