Mediat palestineze kanë raportuar bombardime të forta izraelite në Gaza gjatë natës, duke përfshirë një sulm në një shtëpi në Jabalia në Gazën veriore që vrau të paktën 19 njerëz.
Avionët izraelitë goditën gjashtë shtëpi në Gazën veriore herët të shtunën, duke vrarë të paktën tetë palestinezë dhe duke plagosur 45, raportojnë mediat palestineze.
Nuk kishte asnjë koment të menjëhershëm nga ushtria izraelite.
Patriarkana Ortodokse e Jeruzalemit, besimi kryesor i krishterë palestinez, tha se forcat izraelite kishin goditur Kishën e Shën Porfirit në qytetin e Gazës, ku qindra të krishterë dhe myslimanë kishin kërkuar strehim.
Ndërkohë ka pasur dhe një reagim nga kryeminsitri Benjamin Netanyahu lidhur me zhvillimet e luftës dhe lirimin e pengjeve. Ai është zotuar të “luftojë deri në fitore” në Gaza, duke sinjalizuar se nuk do të ndalen bombardimet e Izraelit dhe pushtimi i pritshëm i enklavës pasi Hamasi liroi dy pengje amerikane.
Mbrëmë grupi islamik liroi nënën dhe vajzën amerikane Judith dhe Natalie Raanan, të cilat u rrëmbyen në sulmin e tij në Izraelin jugor më 7 tetor.
Ato ishin pengjet e parë të konfirmuar nga të dyja palët në konflikt që u liruan që nga sulmet e Hamasit në Izrael, duke vrarë 1400 njerëz, kryesisht civilë dhe duke marrë rreth 200 pengje.
“Dy nga të rrëmbyerit tanë janë në shtëpi. Ne nuk po heqim dorë nga përpjekjet për të kthyer të gjithë njerëzit e rrëmbyer dhe të zhdukur. Në të njëjtën kohë, ne do të vazhdojmë të luftojmë deri në fitore”, tha Netanyahu.
Një reagim ka ardhur edhe nga presidenti Biden, i cili ka treguar se përse Hamasi sulmoi tani. Joe Biden ka thënë se ai mendon se Hamasi ishte i motivuar për të sulmuar Izraelin pjesërisht nga dëshira për të ndaluar normalizimin e marrëdhënieve të vendit me Arabinë Saudite.
“Një nga arsyet pse Hamasi lëvizi kundër Izraelit … ishte se ata e dinin që unë do të ulesha me sauditët,” tha ai në një ngjarje për mbledhjen e fondeve.
Presidenti tregoi se ai mendon se Hamasi e nisi sulmin më 7 tetor, sepse sauditët donin të njihnin Izraelin” dhe ishin gati ta bënin këtë zyrtarisht.
Jerusalemi dhe Riadi i ishin afruar vazhdimisht normalizimit, me zotin Biden që punonte për të ndihmuar në afrimin e dy vendeve, duke njoftuar planet muajin e kaluar në samitin e G20 në Indi për partneritet në një korridor detar.
