Në Këshillin e Lartë Prokurorisë ka nisur mbledhja për zgjedhjen e kreut të ri të SPAK.
Altin Dumani ishte kandidati i dytë që shpalosi platformën pas Adnan Xholit.
Në hyrje të fjalës së tij, Dumani u shpreh se është shumë i motivuar për të garuar për kreun e SPAK.
Dumani tha se punën në SPAK e ka parë si një mision të vështirë. Ai theksoi se ka hetuar çështje të lidhura me korrupsion në nivele të larta, duke çuar në gjykim gjyqtarë dhe prokurorë, apo drejtues të ndryshëm institucionesh.
“Kam shumë dosje në hetim. E kam shkruar edhe në platformën time; do vazhdoj të ndjek çështje shumë të rëndësishme që kanë impakt në opinionin publik apo që lidhen me fatet integruese të vendit. e kam bërë edhe si zëvendësues, nuk ka qenë e thjeshtë, kam dalë nga puna në 7.15 dhe jam kthyer në 7 të darkës”, tha Dumani.
Kreu i ri i Strukturës së Posaçme Kundër Korrupsionit dhe Krimit të Organizuar do të zgjidhet mes tre prokurorëve: Adnan Xholi, Altin Dumani dhe Edvin Kondili.
