Kosovë – Ka dështuar seanca konstituive në Kuvendin e Kosovës. Deputetët nuk arritën të kalonin pikën e parë të rendit të ditës, atë të miratimit të Komisionit të Përkohshëm për verifikimin e mandateve dhe kuorumit.
LLV arriti të sigurojë vetëm 52 vota pro për miratimin e këtij raporti ndërkohë që 46 ishin kundër dhe 11 abstenim. PDK, LDK dhe AAK votuan kundër këtij raporti. Partitë opozitare argumentuan se anëtarët e qeverisë në detyrë, që janë zgjedhur deputetë, nuk dorëzuan në kohë dorëheqjet nga postet ekzekutive.
Kryesuesi i seancës konstituive, Avni Dehari njoftoi ndërprerjen duke shtuar se do t’i drejtohen me një letër presidentes Vjosa Osmani për mënyrën se si do të veprojnë në vijim.
“Detyrohemi të ndërpresim seancën dhe me letër t’i kërkojmë presidentes se si të veprojmë në të ardhmen”, u shpreh ai.
Në seancën konstituive duhej që deputetët, pas miratimit të raportit, të bënin betimin dhe të zgjidhinin kryetarin dhe nënkryetarët. Gjatë mbajtjes së seancës, u bë publike edhe dorëheqja e kryeministrit në detyrë Albin Kurti dhe e kabinetit të tij qeveritar.
Kjo situatë zvarrit formimin e qeverisë dhe nisjen e legjislaturës së re, ndërkohë që pritet reagimi i presidentes dhe partive politike për të dalë nga kriza parlamentare.
